Fréttir & tilkynningar

Þann 9. maí sl. hélt bæjarstjórn opinn kynningarfund um aðalskipulag dreifbýlis. Á fundinum kynntu þær Erla Bryndís Kristjánsdóttir og Áslaug Katrín Aðalsteinsdóttir arkitektar drög að skipulagstillögum fyrir svæðið. Vakin er athygli á að enn er um að ræða drög sem umhverfisnefnd og bæjarstjórn hafa í vinnslu. Þau eru í svokölluðu ,,samráðsferli” og enn er hægt að koma ábendingum eða athugasemdum við þau á framfæri við umhverfisnefnd. Nefndin og svo bæjarstjórn munu síðar staðfesta þessi drög og gera að formlegum tillögum um skipulag á svæðinu. Þá hefst hið formlega kynningar- og skipulagsferli og þá mun enn auglýstur frestur til að gera formlegar athugasemdir við vinnuna.   Hægt er að nálgast tillögurnar hér á bæjarvefnum, neðarlega á hægri væng síðunnar. Þar er einnig hægt að senda inn athugasemdir.  

Þann 13. maí sl. úthlutaði Menningarráð Vesturlands styrkjum fyrir árið 2006. Nokkrar umsóknir frá Grundarfirði og tengdar Grundarfirði hlutu styrk. Þar ber fyrst að nefna að Fjölbrautaskóli Snæfellinga hlaut styrk fyrir „Listahátíð ungs fólks, listasmiðjur í Fjölbrautarskóla Snæfellinga“, þá hlaut Dögg Mósesdóttir styrk til gerðar kvikmyndar um sjóslys í Grundarfirði, Eyrbyggja - sögumiðstöð fékk styrk til rafræns sýningarhalds, Eyrbyggjar, hollvinasamtök Grundarfjarðar, fengu styrk til bókaútgáfu í ritröðina safn til sögu Eyrarsveitar, Héraðsnefnd Snæfellinga hlaut styrk vegan Jules Verne hátíðar og Byggðasafn Snæfellinga vegna Norðurslóðaáætlununar, verslunarsögu Breiðafjarðar í Norska húsinu.

Í auglýsingu um sumarstörf í áhaldahúsi sem birtist í Vikublaðinu Þey í gær, 18. maí, var auglýst tímakaup miðað við gamla launatöflu. Rétt tímakaup er eftirfarandi: 17 ára: 700 kr. á tímann 18 ára og eldri: 732 kr. á tímann   Enn er hægt að skila inn umsóknum um sumarstörf í áhaldahúsi og í vinnuskóla. Umsóknum skal skilað á bæjarskrifstofu, Grundargötu 30. Nánari upplýsingar veitir verkstjóri í s: 691-4343. 

Straumlaust verður í Grundarfirði frá kl. 01:00 í nótt og fram eftir nóttu. 

Í gær kom upp umtalsverður leki í vatnsveitukerfinu í þéttbýli Grundarfjarðar. Leitað hefur verið í alla nótt að lekanum en án árangurs. Nú er á leiðinni frá Reykjavík maður með lekaleitartæki sem ætlar að freista þess að finna lekann. Bæjarbúar eru vinsamlegast beðnir um að fara sparlega með vatnið á meðan ástandið varir. 

Ungmennafélag Grundarfjarðar er með aðalfund sinn í kvöld kl 20:00 á Hótel Framnesi. Hvetjum alla til þess að mæta og taka þátt í umræðum.   Stjórn UMFG

Umhverfis- og menningardagur Grundfirðinga verður laugardaginn 20. maí nk. Dagurinn er haldinn að tillögu fræðslu- og menningarmálanefndar og einstaklinga í bænum. Sjá dagskrá með því að smella hér.

Á fundi sínum þann 15. maí sl. samþykkti bæjarstjórn  Fjölskyldustefnu Grundfirðinga.   Í fjölskyldustefnu eru sett markmið um að styðja enn betur við fjölskyldur í sveitarfélaginu og þar eru einnig ákveðnar leiðir að þeim markmiðum, verkefni sem eru tímasett og falin ákveðnum ábyrgðaraðilum til framkvæmdar.

Opnuð hefur verið upplýsingasíða á vef Grundarfjarðarbæjar um kosningarnar 27. maí nk. Þar er m.a. hægt að kanna hvort einstaklingur sé á kjörskrá í Grundarfirði með því að slá inn kennitölu viðkomandi. Eftir því sem næst verður komist er Þessi möguleiki aðeins í boði hjá fáum sveitarfélögum. Eftir sem áður liggur kjörskrá frammi á bæjarskrifstofunni og á bókasafninu.  

Jeratún ehf. óskar hér með eftir tilboðum í verkið; Fjölbrautaskóli Snæfellinga – Lagnir í lóð og fleira 2006.   Um er að ræða lagnir í lóð og fleira ásamt tilheyrandi jarðvinnu á lóð Fjölbrautaskóla Snæfellinga í Grundarfirði. Verklok eru 10. júlí 2006.