Fréttir & tilkynningar

Trésmiðja Guðmundar Friðrikssonar ehf. er að byggja parhús við Ölkelduveg nr. 25-27. Íbúðirnar eru hver um sig um það bil 120 m2, þar af 30 fm bílskúr. Að sögn Guðmundar eru lóðirnar í Ölkeldudal mjög skemmtilegar byggingarlóðir.   Smiðirnir Guðmundur Friðriksson og Guðjón Gíslason

  Þar er bjart og vítt til veggja, fjallahringur til handa beggja. Sólin sést þar snemma rísa og hafflötinn að kveldi lýsa.   Svo er ort um Hjarðarból, en nýi vegurinn í Kolgrafafirði liggur vestanmegin um land jarðarinnar Hjarðarbóls. Með opnun nýja vegarins og brúarinnar yfir Kolgrafafjörð opnast einnig nýjar víddir í landslagi á svæðinu, sjónarhorn sem ekki voru eins aðgengileg almenningi áður. Fróðlegt er þá að velta fyrir sér örnefnum á svæðinu.

Í dag, 13. desember 2004, var merkum áfanga náð í samgöngusögu Snæfellinga þegar opnað var formlega fyrir umferð yfir nýju brúna og veginn yfir Kolgrafafjörð. Það var Sturla Böðvarsson samgönguráðherra sem ók fyrstur yfir fjörðinn og í kjölfarið var hið nýja samgöngumannvirki opnað fyrir almennri umferð.  

Mynd: Sverrir Karlsson Starfsmenn Vegagerðarinnar unnu við það í morgun að rétta vegrið og taka til á nýju vegfyllingunni yfir Kolgrafafjörð á Snæfellsnesi. Þar með lýkur vinnu við þverun fjarðarins og brúargerð en nýja leiðin styttir veginn milli Grundarfjarðar og Stykkishólms um 7 kílómetra. Næstkomandi mánudag 13. des. klukkan 15 mun samgönguráðherra, Sturla Böðvarsson, opna veginn fyrir umferð en formleg vígsla hans verður þó ekki fyrr en í vor. Sótt á vef Skessuhorns, www.skessuhorn.is.  

Ásgeir Valdimarsson, formaður stjórnar Jeratúns ehf., Dagbjartur Harðarson ,,stjóri” á byggingarstað og Bjarni Árnason eftirlitsmaður spá í spilin.   Iðnaðarmenn eru nú í óða önn að ljúka við seinni hluta byggingar skólahúsnæðis fyrir Fjölbrautaskóla Snæfellinga, en byggingaraðili og eigandi hússins er Jeratún ehf., hlutafélag í eigu sveitarfélaganna á norðanverðu Snæfellsnesi. Starfsemi skólans hófst í lok ágúst, í hluta hússins, en nú er búið að opna á milli rýma og styttist í að húsnæðið verði allt tekið í notkun. Húsnæðið verður formlega vígt þann 7. janúar n.k. Meðfylgjandi myndir voru teknar í skólanum þriðjudaginn 7. desember sl. Sjá fleiri myndir hér.  

Jólastofa í Sögumiðstöðinni                  Mynd: HJJÍ Sögumiðstöðinni er búið að setja upp jólaskreytta dagstofu í anda áranna í kringum 1960. Margt af því sem fyrir augu ber vekur upp minningar þessa tíma. Heimagert jólatré og pappírsskraut er eitt af því sem horfið er nú sýnum manna. Þó er eitthvað um að fólk kjósi að hafa jólatrén sín í þessum stíl í dag og þykir það flott. Ef einhverjir eiga muni í fórum sínum frá þessum tíma má alltaf bæta við sýninguna, og má hafa samband við safnstjóra Sögumiðstöðvarinnar, Inga Hans Jónsson. Handverksfólk er einnig með sölubása í Sögumiðstöðinni þar sem heimagert handverk er til sölu.

Í nóvember sl. hélt Rannsóknarmiðstöð Íslands (RANNÍS) kynningu á niðurstöðum verkefna í markáætlun um upplýsingatækni og umhverfismál, undir yfirskriftinni:   Markáætlun um upplýsingatækni og umhverfismál 1999 – 2004 - Uppgjör - Málþing og kynning á niðurstöðum verkefna og veggspjaldasýning Hótel Loftleiðum 11. nóvember 2004  

Góður mánuður   Í töflunni hér að neðan má sjá yfirlit yfir landaðan afla eftir tegundum í Grundarfjarðarhöfn í nóvember. Taflan sýnir samanburð á milli áranna 2003 og 2004. Heildarafli í nóvember á þessu ári er 1.511.694 kg en var 1.265.314 kg í sama mánuði í fyrra.   Tegundir 2003 2004 Þorskur 263.567 316.764 kg Ýsa 237.005 336.226 kg Karfi 92.381 82.680 kg Steinbítur 9.759 26.248 kg Ufsi 24.930 51.829 kg Beitukóngur 65.650 38.065 kg Rækja 97.664 kg Langa  3.241 2.548 kg Keila 4.688 2.408 kg Gámafiskur 534.057 515.827 kg Aðrar tegundir  30.036 41.435 kg Samtals 1.265.314 1.511.694 kg 

50. fundur bæjarstjórnar Grundarfjarðar var haldinn í Samkomuhúsi Grundarfjarðar í gær. Á dagskrá var m.a. ákvarðanir um gjaldskrár/álagninu vegna fjárhagsáætlunar 2005. Í ljósi minnkandi skatttekna á undanförnum misserum sér bæjarstjórn sig knúna til að hækka skattprósentu fasteignagjalda, vatnsskatts, holræsagjalda og lóðarleigu. Samþykkt var samhljóða að vísa fjárhagsáætlun 2005 til síðari umræðu.  

Í kvöld, fimmtudagskvöld 2. desember, verða tónleikar í Ólafsvíkurkirkju þar sem Páll Óskar Hjálmtýsson, söngvari, og Monika Abendroth, hörpuleikari, koma fram ásamt strengjakvartett.