Fréttir & tilkynningar

Opið hús verður í Sögumiðstöðinni fyrir unglinga á milli kl. 21-23 eftirtalda daga til áramóta:   Miðvikudaginn 22. desember Fimmtudaginn 23. desember Mánudaginn 27. desember Þriðjudaginn 28. desember Miðvikudaginn 29. desember Fimmtudaginn 30. desember   Foreldrar sem gætu verið með unglingunum eitthvert þessara kvölda eru beðnir að hafa samband við bæjarskrifstofuna í síma 430 8500. Breyting getur orðið á opnunartímum. Fylgist með hér á heimasíðunni.

Setið til borðs á Hótel Framnesi Börnin í Leikskólanum Sólvöllum gerðu sér glaðan dag í morgun og skelltu sér á kaffihús. Börn fædd 2002 fóru á Kaffi 59 og börn fædd 1999-2001 fóru á Hótel Framnes. Börnin fengu heitt súkkulaði með rjóma og smákökur. Árdís Sveinsdóttir, fyrrverandi starfsmaður leikskólans, mætti á Hótel Framnes og las jólasögur fyrir börnin.    Árdís að lesa jólasögur fyrir börnin

Hagstofa Íslands gaf í morgun út bráðabirgðatölur yfir mannfjölda þann 1. desember 2004. Íbúar í Grundarfjarðarbæ voru 938 en voru 936 á sama tíma í fyrra. Íbúum hefur því fjölgað um tvo. Á öðrum stöðum á Snæfellsnesi var nokkur fólksfækkun á milli ára.

Föstudaginn 17. desember sl. voru litlu jólin í Grunnskóla Grundarfjarðar. Byrjað var á því að dansa kringum jólatréð í íþróttahúsinu en síðan fóru nemendur með umsjónarkennara sínum í stofur, áttu þar stund saman og skiptust á lukkupökkum.  Föstudagurinn 17. des var jafnframt síðasti kennsludagur grunnskólans og nemendur því komnir í jólafrí. Kennsla hefst aftur skv. stundaskrá miðvikudaginn 5. janúar.

Séð yfir hið nýja hverfi Á árinu 2003 var unninn fyrsti áfangi í gatnagerð í Ölkeldudal, sem er svæði afmarkað af grunnskóla og íþróttahúsi í austri, dvalarheimilinu Fellaskjóli að norðanverðu og íbúðabyggð á Hjaltalínsholti í vestri. Nýr vegur, Ölkelduvegur, tengir saman þessa staði og mannvirki. Framkvæmdum við gatnagerð og lagnir var fram haldið á þessu ári, en með þeim urðu til 13 byggingarlóðir fyrir raðhús, 4 lóðir eru ætlaðar undir einbýlishúsabyggingar syðst á svæðinu, auk þess sem parhús verður á einni lóð. Á öllum lóðunum er heimilt að byggja eins til tveggja hæða byggingar.

Gámastöðin verður lokuð á morgun, laugardaginn 18. desember nk., vegna jarðarfarar.   Verkstjóri 

Jón Bald tekur við jólapakka frá jólasveininum Jólaball var haldið í Leikskólanum Sólvöllum í gær, fimmtudaginn 16. desember. Dansað var kringum jólatré og kennarar úr tónlistaskólanum, þeir Friðrik Vignir og Kristján léku undir söng. Jólasveinar komu í heimsókn og færðu öllum gjafir. Eftir ballið var boðið var upp á heitt súkkulaði og smákökur sem nemendur leikskólans höfðu bakað fyrir jólaballið. Ánægjulegt var hversu margir foreldrar mættu á jólaballið til að taka þátt í gleði barnanna.

Á morgun, laugardaginn 18. desember, halda verslanir í Grundarfirði Brúarhátíð í tilefni af opnun vegar yfir Kolgrafarfjörð. Frá klukkan 14 - 18 verða verslanirnar Hrannarbúðin, Hamrar, Blómabúð Maríu, Lindin, Gallerí Tína og Stellubúð með ýmsa afslætti í tilefni af þessari miklu samgöngubót.

Jólatónleikar Tónlistarskóla Grundarfjarðar voru haldnir fimmtudaginn 16. desember sl. í Grundarfjarðarkirkju. Nemendum var skipt upp í tvo hópa eftir aldri og sýndu þau foreldrum sínum og öðrum gestum afrakstur annarinnar.

Foreldrafélag grunnskólans hefur opnað vefsíðu. Þar er að finna allar helstu upplýsingar er varða félagið. Síðan er á vef grunnskólans og hana má sjá hér.