Fréttir & tilkynningar

Í tilefni af 112 deginum, sunnudaginn 11. febrúar mun slökkvilið Grundarfjarðarbæjar hafa opið hús milli kl.14-16.    Notið tækifærið og kynnið ykkur starfsemi viðbragðsaðila bæjarins.    

    Dagur leikskólans er í dag 6. febrúar og er þetta í ellefta skiptið sem dagurinn er haldinn hátíðlegur en það var á þessum degi árið 1950 sem frumkvöðlar leikskólakennara stofnuðu fyrstu samtök sín. Þessi glæsilegi hópur barna og starfsfólks af Sólvöllum og Eldhömrum fór í skrúðgöngu um Grundarfjörð í tilefni dagsins.  

Að undanförnu höfum við á leikskólanum verið að vinna með vináttu og hvað það þýðir að vera vinir.  Það hefur t.d. verið skrifað niður hvað börnin telja að vinátta þýði og hvað vinir gera.  Mjög gaman að vinna að þessu verkefni.  Á morgun er dagur leikskólans og að því tilefni förum við í skrúðgöngu ásamt Eldhömrum.  Við höfum líka verið með lestrarátak þar sem við hvetjum foreldra til að lesa fyrir  börnin sín. Lestrarátakinu lýkur á morgun.    

  Grundarfjarðarbær fékk góða gesti í heimsókn í dag þegar forseti sænska þingsins ásamt sendinefnd áttu hér viðdvöl frá hádegi og fram eftir degi. Sendinefndin var áhugasöm um sveitarstjórnarmál og hvernig byggðapólitík og byggðastefna gangi fyrir sig hér á landi. Að loknum hádegisverði á Bjargarsteini fór hópurinn í heimsókn í G.Run, þar sem gestirnir kynntu sér vinnsluna.  

    Í níunda sinn blæs Grundarfjarðarbær til hinnar árlegu Ljósmyndasamkeppni bæjarins. Menningarnefnd hefur ákveðið að þema keppninnar árið 2018 verði fuglar og dýr. Samkvæmt reglum keppninnar verða myndirnar að vera teknar innan sveitarfélagsmarka á tímabilinu janúar til nóvember 2018 og má hver þátttakandi senda inn að hámarki fimm myndir.    

    Stjórnarráðið leitar að 12 ungmennum á aldrinum 13-18 ára í Ungmennaráð Heimsmarkmiða Sameinuðu þjóðanna á Íslandi. Nánari upplýsingar eru í auglýsingu frá Stjórnarráðinu sem finna má hér.   Umsóknarfrestur er til og með 16. febrúar 2018.

    1. febrúar er dagur kvenfélagskonunnar og eru þær svo sannarlega vel að því komnar að eiga sinn dag í dagatalinu. Grundarfjarðarbær óskar okkar yndislegu kvenfélagskonum í Gleym mér ei innilega til hamingju með daginn og þakkar óeigingjarnt og mikið starf í þágu samfélagsins. Njótið dagsins! 

Nýtt sorphirðudagatal er komið á vefinn. Dagatalinu hefur verið breytt til samræmis við óskir bæjarstjórnar, þar sem bætt hefur verið við aukalosun á grænu tunnunni í desember.    

    Umsóknarfrestur í sjóði Uppbyggingarsjóðs Sóknaráætlunar Vesturlands hefur verið framlengdur til miðnættis, sunnudaginn 21. janúar nk. vegna innleiðingar á nýju umsóknarkerfi. Upplýsingar varðandi styrkina veita Ólöf í síma 898 0247, Ólafur í síma 892 3208 og Elísabet í síma 892 5290.  

Auglýsing vegna úthlutunar byggðakvóta á fiskveiðiárinu 2017/2018 sbr. reglugerð um úthlutun byggðakvóta til fiskiskipa nr. 604, 3. júlí 2017   Fiskistofa auglýsir eftir umsóknum um byggðakvóta til fiskiskipa fyrir: Grundarfjörð Auk reglugerðarinnar er vísað til sérstakra úthlutunarreglna í neðanskráðum byggðalögum sbr. auglýsingu nr. 5/2018 í Stjórnartíðindum   Snæfellsbær (Arnarstapi, Hellissandur, Rif og Ólafsvík) Sveitarfélagið Garður Sveitarfélagið Skagaströnd Húnaþing vestra (Hvammstangi)   Umsóknum skal skilað til Fiskistofu ásamt samningi við vinnsluaðila, á eyðublöðum sem er að finna á heimasíðu stofnunarinnar (fiskistofa.is), og þar eru ofangreindar reglur einnig aðgengilegar.  Umsóknarfrestur er til og með 22. janúar 2018.   Fiskistofa, 5. janúar 2018 .