Fréttir & tilkynningar

Um þessar mundir er verið að kanna áhuga og þörf fyrir þriggja fasa rafmagn á býlum í ábúð.  Sent hefur verið bréf til ábúenda og þeir eru beðnir um að hafa samband við skipulags- og byggingafulltrúa Grundarfjarðarbæjar og gera grein fyrir því hvort þörf er fyrir þrífösun.  Könnun þessi er gerð fyrir iðnaðarráðuneytið sem hyggst móta aðgerðaáætlun í framhaldinu.   Athugið að skila þarf upplýsingum til iðnaðarráðuneytisins fyrir 1. febrúar n.k. svo koma þarf ábendingum til skipulags- og byggingafulltrúa í síðustu viku janúar. 

Innkaupareglur Grundarfjarðarbæjar voru samþykktar á bæjarstjórnarfundi þann 10. janúar 2007. Þeim er ætlað að stuðla að vönduðum og hagkvæmum innkaupum Grundarfjarðarbæjar og tryggja gæði, þjónustu og verka sem bærinn kaupir.  Ennfremur að stuðla að því að Grundarfjarðarbær hagi innkaupum sínum í samræmi við góða viðskiptahætti og tryggja að stjórnsýsla á sviði innkaupa sé vönduð. Innkaupareglur Grundarfjarðarbæjar er hægt að skoða með því að fara inn á stjórnsýsla og síðan reglur og samþykktir.  

Ráðið hefur verið í stöðu þjónustufulltrúa á skrifstofu Grundarfjarðarbæjar.  Kristín Pétursdóttir sem gegnt hefur þeirri stöðu undanfarið hefur tekið við starfi aðalbókara og ritara.  Í starf þjónustufulltrúa hefur verið ráðin Arna Hildur Pétursdóttir og er hún boðin velkomin til starfa.  Arna Hildur starfaði áður í útibúi Kaupþings í Grundarfirði sem gjaldkeri.

Menntamálaráðherra hefur lagt fram frumvörp að lögum um grunnskóla, leikskóla, framhaldsskóla og um ráðningar kennara og skólastjórnenda.  Menntamálanefnd Alþingis hefur óskað eftir umsögnum um frumvörpin.  Bæjarstjórn Grundarfjarðarbæjar hefur sett vinnuhóp til þess að fara yfir frumvörpin og gera tillögur að umsögnum.  Tveir fulltrúar úr bæjarstjórninni eru í vinnuhópnum og formaður fræðslu- og menningarmálanefndar.  Sérstaklega er óskað eftir því að foreldrafélög og nemendafélög fari yfir frumvörpin og láti í té umsagnir ef vilji er fyrir hendi.  Unnt er að koma ábendingum til vinnuhóps bæjarstjórnarinnar á skrifstofu Grundarfjarðarbæjar." Hér fyrir neðan er hægt að skoða frumvörpin: Frumvarp um framhaldsskóla Frumvarp um grunnskóla Frumvarp um leikskóla Frumvarp um kennara  

Kaffispjall - Hlutverk og tilvera bókasafna. Viðtal við Önnu Torfadóttur og Ingibjörgu Rögnvaldsdóttur frá Borgarbókasafninu í Morgunþætti Rásar 1  þann 11. jan. 2008. Í sama þætti er fjallað um Kristínu Steinsdóttur en bók hennar, Á eigin vegum, var nýlega tilnefnd til Norrænu bókmenntaverðlaunanna. Sjá vefupptöku. Sjá meira á vef bókasafnsins  

Slökkvilið Grundarfjarðar hefur sent frá sér bréf til þess að minna húseigendur á að huga að því hvort reykskynjarar séu í öllum híbýlum, athuga hvort skipta þurfi um rafhlöður og hvort þörf sé á að bæta við reykskynjurum. Hér má sjá bréfið frá slökkviliðinu.

Foreldrar eru vinsamlegast beðnir um að skoða vel í skápa og skúffur börnum sínum og athuga hvort þar gæti leynst keppnistreyja eða buxur frá UMFG. Það er alltaf eitthvað um það að krakkarnir taki búninginn óvart með sér heim. Ef þið finnið eitthvað hafið þá samband við Unni í síma 891-6007. Leitið vel! 

 Auglýst er eftir umsóknum.   Ríkisstjórnin hefur ákveðið að veita alls 160 milljónum króna til eflingar ferðaþjónustu á þeim svæðum sem verða fyrir aflasamdrætti vegna skerðingar á veiðiheimildum. Auglýst er eftir umsóknum um stuðning við verkefni til atvinnusköpunar í ferðaþjónustu á ofangreindum svæðum. Umsækjendur geta verið sveitarfélög, einstaklingar og fyrirtæki og er hámarksstyrkur til hvers verkefnis 8 milljónir kr. Verkefnin verði unnin á árunum 2008-2009 og verður styrkurinn greiddur í tvennu lagi, helmingur hvort ár. Seinni greiðslan er háð árangursmælingu í samræmi við ákvæði í umsókn, en hver umsækjandi gerir tillögu að árangursmælikvarða fyrir viðkomandi verkefni. Við afgreiðslu umsókna verður sérstaklega litið til langtímaáhrifa verkefna á sköpun nýrra starfa á svæðunum og hversu hratt störfin geta orðið til. Ekki er um að ræða styrki til menntunar eða rannsókna. Umsóknum skal skila á sérstökum umsóknareyðublöðum, sem hægt er að nálgast hér á vefnum (sjá terngil hér fyrir neðan). Umsóknum skal skila til Byggðastofnunar, Ártorgi 1, 550 Sauðárkróki eða Ferðamálastofu, Lækjargötu 3, 101 Reykjavík fyrir 5. febrúar 2008. Hér má nálgast umsóknareyðublöð.  

Byggingarfulltrúin í Grundarfirði hefur ákveðið að standa að söfnun og losun brotajárns. Það er eindregin ósk Byggingarfulltrúa Grundarfjarðar að fyrirtæki og einstaklingar í bænum taki virkan þátt í verkefninu.   Er hér með óskað eftir því að fyrirtæki og einstaklingar sendi inn til Byggingarfulltrúans í Grundarfirði upplýsingar um magn og hvar efnið er niðurkomið svo hægt sé að taka myndir og meta í tonnum og umfangi það sem flytja á.   Er vonast til að viðtökur verði góðar svo hægt sé að ná hagstæðum samningum. Frestur til að senda inn upplýsingar er til 27 janúar.  

88. fundur bæjarstjórnar Grundarfjarðarbæjar verður haldinn fimmtudaginn 10. janúar 2008 kl. 16.15 í samkomuhúsinu og er öllum opin. Sjá dagskrá og fundarboð með því að smella hér.