Vösk sveit frá UMFÍ heimsækir Grundarfjörð

Sambandsráðsfundur UMFÍ var haldinn í Stykkishólmi laugardaginn 11. október. Að fundi loknum komu fundargestir í heimsókn til Grundarfjarðar til að kynna sér aðstöðuna og stöðu mála fyrir unglingalandsmótið sem haldið verður hér á næsta ári. Hópurinn samanstóð af stjórn og starfsmönnum UMFÍ og formönnum héraðssambandanna. Eftir stutta rútuferð um svæðið hélt hópurinn til móttöku í Sögumiðstöðinni og sá þar kynningu og þáði veitingar. Gestirnir voru ánægðir með stöðu mála og hlakka til að heimsækja okkur að ári.   Myndir af heimsókninni má sjá hér.  

Vika staðbundins lýðræðis í Evrópu

Vikan 13. – 17. október hefur verið valin vika staðbundins lýðræðis og er tilgangurinn með henni að ýta undir þekkingu á staðbundnu lýðræði og styrkja hugmyndir um þátttöku einstaklinga í lýðræðinu.   Að þessu tilefni hefur verið ákveðið að opið hús verði í stofnunum Grundarfjarðarbæjar föstudaginn 17. október og mánudaginn 20. október. Grundfirðingar eru hvattir til að kíkja í heimsókn og kynna sér starfsemina.   Fyrir frekari upplýsingar veljið meira.

Aðalsteinn Þorvaldsson settur í embætti í Setbergsprestakalli

  Góður prestur er mikilvægur hverju byggðarlagi og kannski aldrei mikilvægari en þegar viðsjárverðir tímar ganga yfir líkt og nú. Á sunnudaginn var nýr prestur settur í embætti í Setbergsprestakalli. Aðalsteinn Þorvaldsson heitir hann og var vígður til starfa af biskupi Íslands séra Karli Sigurbjörnssyni sunnudaginn 5. október sl. Innsetningu hins nýja prests annaðist prófasturinn í Snæfellsness- og Dalaprófastdæmi, sr. Gunnar Eiríkur Hauksson. Í sinni fyrstu predikun hvatti hinn nýi sóknarprestur söfnuð sinn til að sýna styrk í trúnni. Eftir athöfnina var þéttskipað í safnaðarheimilinu í kirkjukaffi.   Úr grein Gunnars Kristjánssonsonar í Morgunblaðinu. Myndina tók Sverrir Karlsson.  

Frí í frjálsum

Það er frí í frjálsum íþróttum, þriðjudaginn 14. okt. og föstudaginn 17. okt. af óviðráðanlegum ástæðum. Kveðja, Kristín H.

Kynningarfundur vegna nýrra skólalaga

Menntamálaráðherra mun kynna nýja menntastefnu á fundi í Borgarnesi fimmtudaginn 16. október. Fundurinn hefst klukkan 20:00 og er opinn borgarafundur. Fundurinn verður sendur út með fjarfundarbúnaði til íbúa á Snæfellsnesi í Framhaldsskóla Snæfellinga í Grundarfirði. Frekari upplýsingar má finna í fréttatilkynningu með því að velja meira. 

Styrkveitingar árið 2009

Til þeirra sem áforma að sækja um styrki til Grundarfjarðarbæjar á árinu 2008:   Vinna við gerð fjárhagsáætlunar 2009 er hafin. Þeir sem hyggjast sækja um styrki á næsta ári þurfa að skila inn umsókn í síðasta lagi þann 20. október 2008. Skila ber umsóknum eða senda þær í pósti til skrifstofu Grundarfjarðarbæjar, Grundargötu 30, 350 Grundarfirði.    

Síðasta opnunarvika sundlaugarinnar

Næstkomandi föstudag, þann 17. október mun sundlaugin loka fyrir veturinn. Sundlaugin verður opin til kl. 19.   Starfsfólk. 

Orðsending til íbúa Grundarfjarðarbæjar:

Bæjarstjórn Grundarfjarðarbæjar fylgist grannt með þróun í efnahagsmálum Íslands dag frá degi.  Þær hamfarir í peningamálum sem dunið hafa yfir koma illa við alla, þar með talið sveitarfélög.  Bæjarstjórnin mun leggja allt kapp á að tryggja og viðhalda áfram grunnþjónustu bæjarins og það að óþægindi íbúa verði í lágmarki vegna þeirra þrenginga sem kunna að vera í augsýn.  Bæjarstjórnin vonar og óskar þess að íbúar haldi rósemi sinni og láti ekki bugast við þær óþægilegu fréttir sem dynja yfir þessa daga.  Bæjarstjórnin bendir á, að íbúar geta leitað til bæjarskrifstofunnar um viðtöl vegna erfiðleika og einnig er mögulegt að leita til félagsþjónustu Snæfellinga um ráðgjöf og aðstoð.  Bæjarfulltrúar eru einnig reiðubúnir til þess að eiga fundi með íbúum um þessi mál og önnur sem varða heill þeirra og byggðarlagsins.   Bæjarstjórn Grundarfjarðarbæjar færir íbúum bæjarins og Snæfellingum öllum bestu óskir um að þetta efnahagslega fárviðri valdi ekki skaða og miklum erfiðleikum.    Bæjarstjórn Grundarfjarðarbæjar.  

Skapandi handverk úr heimabyggð

Þá höfum við hafið starfsemi handverksfélags hér í Grundarfirði. Fyrsti fundur var haldinn sunnudaginn 5. október. Það var fámennt en góðmennt og var ákveðið að næsti fundur yrði haldinn á miðvikudaginn 15. október kl: 20:00 í salur að borgarbraut 16 efri hæð (þar sem fjarnámið var til húsa.) Við viljum ítreka að engum félagsmanni er skylt að koma verkum sínum í sölu eða á sýningu þannig að ef þig langar að eyða kvöldstund af og til í góðum félagsskap láttu þá endilega sjá þig.  

Æðruleysi og hugprýði er einkenni Íslendinga þegar erfiðleikar steðja að

Þeir stóru atburðir sem gerst hafa undanfarna daga og vikur í efnahagslífi Íslands láta engan ósnortinn.  Allir verða fyrir áfalli við þær fréttir sem borist hafa.  Margir verða fyrir fjárhagslegum skaða vegna hækkandi skulda, lækkunar og jafnvel hruns á verði hlutabréfa og margvíslegra óþæginda sem erfiðleikar bankanna valda fólki.  Við þessar aðstæður er mikilvægt að halda ró sinni, horfast í augu við vandann, en láta hann ekki buga sig.  Nokkur atriði er vert fyrir okkur öll að hafa í huga við þessar aðstæður:   Það er aldrei öll von úti - alltaf birtir upp um síðir. Tölum varlega - hræðum ekki börnin eða aðra. Fjölskyldur ættu að ræða saman yfirvegað - um að gera að ræða við einhvern ef líðanin er slæm. Það er fólk til staðar fyrir utan fjölskylduna sem er einnig reiðubúið til að hlusta og aðstoða við að finna leiðir - prestar - heilsugæslan - bæjaryfirvöld - félagsþjónustan - ráðgjafarstofa heimilanna og bráðum verða opnaðar sérstakar ráðgjafarstofur á vegum félagsmála- og tryggingaráðuneytisins. Það er hollt í erfiðleikum að rifja upp og fara yfir hvaða hlutir eru þó jákvæðir í öllu saman og það, að auðsæld er ekki eingöngu talin í fjármunum. Það getur verið gott fyrir hópa að koma saman, t.d. til þess eins að fara í göngutúr og spjalla létt saman á meðan.   Við sem þjóð munum vinna okkur út úr þessum hremmingum sem nú ríða yfir eins og öllum öðrum sem komið hafa.  Hversu langan tíma það tekur vitum við ekki núna, en því fyrr sem við hefjumst handa, því styttra verður í góða stöðu að nýju.   Guðmundur Ingi Gunnlaugsson, bæjarstjóri.