Fréttir & tilkynningar

Rökkurdagar 2008  Skelfing í skammdeginu - uppákomur fyrir alla fjölskylduna.  

Annar fundur handverkfélagsins var haldinn miðvikudagnn 15. október og var vel mætt. Við áttum notalega kvöldstund saman þar sem margt var spjallað ásamt því að Salbjörg Nóadóttir las smásögu eftir Kristínu Marju Baldursdóttur úr bókinni Kvöldljósin eru kveikt. Á meðan lestrinum stóð vann fólk að þeim verkefnum sem það hafði komið með með sér eða einfaldlega lagði við hlustir og fékk sér kaffisopa. Viljum við þakka Salbjörgu kærlega fyrir lesturinn.  

Stofnfundur Taflfélags Grundarfjarðar verður haldinn á Kaffi 59 sunnudaginn 26. október klukkan 17:00. Allir skákáhugamenn velkomnir. 

Nýja bryggjan í Grundarfjarðarhöfn, Miðgarður, verður vígð við hátíðlega athöfn þriðjudaginn 21. október klukkan 16:00. Smíði bryggjunnar hófst í júlí 2006. Hún er 80 metra löng og 20 metra breið og dýptin við hana er 6 metrar við stórstraumsfjöru. Hún mun leysa af Litlubryggju sem er 65 ára gömul, sem var 40 metra löng og 7,5 metrar á breidd.  

Laugardaginn 18. október nk. kl. 14.00-18.00  mun hópur sem nefnir sig W23 halda vísindavöku í húsnæði FSN í Grundarfirði. Vísindavakan er opinn dagur fyrir alla sem vilja koma og kynna sér starfsemi W23 hópsins og náttúrufarsrannsóknir á Snæfellsnesi.

Menntamálaráðherra mun kynna nýja menntastefnu á fundi í Borgarnesi fimmtudaginn 16. október. Fundurinn hefst klukkan 20:00 og er opinn borgarafundur. Fundurinn verður sendur út með fjarfundarbúnaði til íbúa á Snæfellsnesi í Framhaldsskóla Snæfellinga í Grundarfirði. Frekari upplýsingar má finna í fréttatilkynningu með því að velja meira. 

Ildi ehf. fyrirtæki hjónanna Inga Hans Jónssonar og Sigurborgar Kr Hannesdóttur í Grundarfirði hefur verið fengið til að skaffa einn af stjórnendum alþjóðlegrar vatnsráðstefnu á vegum Sameinuðu þjóðanna sem fram fer í Istanbúl í Tyrklandi í mars á næsta ári. Ildi sérhæfir sig m.a. í skipulagningu og að leiða samræðu hagsmunaaðila, almennings, stjórnenda og yfirvalda. “Við sérhæfum okkur meðal annars í því að innleiða breytta stjórnunarhætti og höfum nokkuð langa reynslu af því að tengja saman og virkja ólíka hópa fólk til góða verka. Þetta verkefni er fyrst og fremst viðurkenning til okkar sem rekum lítið fyrirtæki á Íslandi og sýnir hvað hægt er að gera hafi menn trú á sjálfum sér og því sem þeir standa fyrir,” sagði Ingi Hans í samtali við Skessuhorn.   Af vef Skessuhorns.

Spilakvöld verður í samkomuhúsinu á fimmtudaginn 16 október klukkan 20:00. 

Sambandsráðsfundur UMFÍ var haldinn í Stykkishólmi laugardaginn 11. október. Að fundi loknum komu fundargestir í heimsókn til Grundarfjarðar til að kynna sér aðstöðuna og stöðu mála fyrir unglingalandsmótið sem haldið verður hér á næsta ári. Hópurinn samanstóð af stjórn og starfsmönnum UMFÍ og formönnum héraðssambandanna. Eftir stutta rútuferð um svæðið hélt hópurinn til móttöku í Sögumiðstöðinni og sá þar kynningu og þáði veitingar. Gestirnir voru ánægðir með stöðu mála og hlakka til að heimsækja okkur að ári.   Myndir af heimsókninni má sjá hér.  

Vikan 13. – 17. október hefur verið valin vika staðbundins lýðræðis og er tilgangurinn með henni að ýta undir þekkingu á staðbundnu lýðræði og styrkja hugmyndir um þátttöku einstaklinga í lýðræðinu.   Að þessu tilefni hefur verið ákveðið að opið hús verði í stofnunum Grundarfjarðarbæjar föstudaginn 17. október og mánudaginn 20. október. Grundfirðingar eru hvattir til að kíkja í heimsókn og kynna sér starfsemina.   Fyrir frekari upplýsingar veljið meira.