Bæjarstjórnarfundur 9. október

Næsti fundur bæjarstjórnar Grundarfjarðarbæjar verður haldinn í samkomuhúsinu fimmtudaginn 9. október kl. 16.15. 

Rökkurdagar 24.-26. október.

Skelfing í skammdeginu – uppákomur fyrir alla fjölskylduna.  Nú styttist í rökkurdaga og vill fræðslu- og menningarmálanefnd af því tilefni minna á smásögukeppnina sem stendur yfir. Samin skal drauga- eða spennusaga að hámarki 500 orð. Skilafrestur er 10. október. Grundfirðingar á öllum aldri geta tekið þátt og vegleg verðlaun eru í boði. Sögum skal skila á bæjarskrifstofuna. Dagskrá rökkurdagana er nú óðum að taka á sig mynd. Í boði verður meðal annars: uppákomur í leikskóla og grunnskóla, kvikmyndamaraþon, draugaball, upplestur úr ýmsum sögum, samverustund á bókasafninu og margt fleira. Þeir sem hafa hugmyndir að viðburðum hafi samband við fræðslu- og menningarmálanefnd (Sigurður 894-1566)  

Stígamót hefja þjónustu á Vesturlandi

Stígamót bjóða upp á ókeypis viðtalsþjónustu og sjálfshjálparstarf fyrir bæði konur og karla sem beitt hafa verið hvers kyns kynferðisofbeldi. Þjónustan hefur hingað til fyrst og fremst nýst á höfuðborgarsvæðinu. Eftir myndarlega fjáröflun Zontakvenna hefur verið ákveðið að auka og bæta þjónustuna við fólk sem býr utan höfuðborgarsvæðisins.  

Eldri borgarar athugið

Við minnum á spilakvöldið á fimmtudaginn 2. október í fjölbrautarskólanum. 

Kynningarfundur á vegum Stígamóta

Það er komið að þáttaskilum í starfi Stígamóta.  Við höfum lengi haft áhyggjur af því að þjónusta okkar nýtist illa utan höfuðborgarsvæðisins.  Eftir heilabrot og vandað tilraunaverkefni m.a.  á Austurlandi höfum við fundið færa leið til þess að bæta þjónustuna.  Hún felst í því að ráðgjafi frá Stígamótum kemur á staðinn með reglulegu millibili og býður heimafólki upp á ókeypis viðtalsþjónustu.   Zonta studdi starfsemi Stígamóta með myndarlegum hætti til þess að hægt væri að hrinda hugmyndinni í framkæmd, þ.e. kynna verkefnið og fá vonandi í framhaldi af því sveitarfélög í lið með okkur. Er hugmyndin að til að byrja með yrði þetta 3 mánaða samstarfsverkefni.   Við munum heimsækja Snæfellsnes  29. september og  halda þar fræðslu- og kynningarfundi.   Einn fund með fagfólki sem málið varðar,  annan fund í framhaldsskólanum og svo opinn kynningarfundur fyrir alla, mánudagskvöldið 29. september kl. 20:00 í Mettubúð Ólafsvík.  

Kolgrafafjörður

Mjög varhugavert er að keyra inn Kolgrafafjörð því vegurinn er að fara í sundur á nokkrum stöðum.

Kynningarfundur um möguleika Vesturlands til þátttöku í svæðasamstarfi í Evrópu

Samtök sveitarfélaga á Vesturlandi og Vaxtarsamningur Vesturlands standa að fundarröð þar sem farið verður yfir þátttöku í svæðasamstarfi í Evrópu. Einnig verður sagt frá verkefnum Vaxtarsamnings Vesturlands. Frummælendur: Reinhard Reynisson höfundur sýrslunnar Vesturland og svæðasamstarf í Evrópu. Torfi Jóhannesson verkefnisstjóri Vaxtarsamnings Vesturlands. Fundurinn verður haldinn í  Sögumiðstöðinni 1. okt. kl. 20:00 Allir eru velkomnir.

Beggi og Pacas frá hjartanu

        Í tilefni af viku símenntunar ætla Beggi og Pacas að heimsækja vesturland og halda fyrirlestur um kærleikan, fordóma, gleðina og hamingjuna. Einnig munu þátttakendur fá að smakka á gómsætu og hollu góðgæti og munu þeir félagar velta upp þeirri spurningu hvort matur hafi áhrif á andlega líðan.    

Uppskeruhátíð UMFG

Uppskeruhátið Ungmennafélags Grundarfjarðar fór fram þann 22 september síðastliðinn. Það var Soffanías Cecilson hf sem styrkti uppskeruhátíðina að þessu sinni og kunnum við þeim bestu þakkir fyrir það.  

Blóðbankabíllinn

Blóðbankabíllinn verður í Grundarfirði við Samkaup-úrval, þriðjudaginn 23. september 2008 kl. 12.00 - 17.00 Allir velkomnir.