Fréttir & tilkynningar

Á vegum Rökkurdaga er að ljúka ljósmyndasamkeppninni Mannlíf og umhverfi Grundarfjarðarbæjar.  Öllum er heimil þátttaka hægt er að senda inn bæði nýjar og gamlar ljósmyndir af mannlífi og/eða umhverfi Grundarfjarðarbæjar. Myndirnar verða svo til sýnis í Hrannarbúðinni á Rökkurdögum.  

35. hafnasambandsþing var haldið dagana 12.-13. október á Hótel Höfn, Hornafirði. Gísli Gíslason, hafnarstjóri Faxaflóahafna, var endurkjörinn formaður Hafnasambandsins til tveggja ára. Ásamt honum voru kjörin í stjórn: Björg Ágústsdóttir, Grundarfirði Björn Magnússon, Hafnasamlagi Norðurlands Helga Jónsdóttir, Fjarðabyggð Ólafur M. Kristinsson, Vestmannaeyjum Ólafur Örn Ólafsson, Grindavík Skúli Þórðarson, Húnaþingi vestra  

Töluverðar framkvæmdir eru nú við byggingar íbúðarhúsa í Grundarfirði. Við Ölkelduveg 1-7 er verið að byggja fjögurra íbúða raðhús, við Ölkelduveg 21 eru framkvæmdir hafnar við grunn fyrir einbýlishús, við Fellasneið 24 er einbýlishús orðið fokhelt, við Fellabrekku 7-21 er verið að efnisskipta lóðir fyrir byggingu fjögurra parhúsa og nýlega voru afhentar fjórar fullbúnar íbúðir við Grundargötu 69. Í myndabankanum má sjá myndir af íbúðarhúsum í byggingu sem teknar voru í blíðunni í gær, 18. okt.  

Kennsla hófst, að hluta, í nýju skólahúsnæði að Borgarbraut haustið 1960. Húsnæðið var fullgert í byrjun janúar 1962 og vígt formlega á þrettándanum. Flestir, eða 82%, svöruðu á þann hátt að fyrsti hluti skólans hafi verið tekin í notkun árið 1962.

Vinna við fjárhagsáætlun fyrir árið 2007 er hafin. Félagasamtök sem hafa í hyggju að sækja um styrki eru hvött til að leggja fram styrkbeiðni á bæjarskrifstofu Grundarfjarðar sem fyrst og ekki síðar en 1. nóvember nk.   Bæjarstjóri

Vélaleiga Kjartans Elíassonar er þessa dagana að keyra möl í bil milli vegkants og kantsteins á götunum þar sem malbik var lagt á í sumar og nýr kantsteinn steyptur. Mölin er sett sem stuðningur við kantsteininn og jafnframt ætluð sem fyllingarefni undir gangstéttir sem síðar koma meðfram götunum. Sjá fleiri myndir í myndabankanum með því að smella hér.  

72. fundur bæjarstjórnar Grundarfjarðar verður haldinn í samkomuhúsinu í dag, miðvikudaginn 18. október, og hefst kl. 17. Á dagskrá er m.a. fundargerðir nefnda og ráða, yfirlit um skil á staðgreiðslu, endurskoðuð fjárhagsáætlun árið 2006, tillaga að nýjum reglum um daggæslu í heimahúsum, tilnefning í endurmatsteymi vegna starfsmats, tillaga að samning um veghald vegar nr. 57, fyrirspurn til forseta bæjarstjórnar frá fulltrúum L-lista,  tillaga L-lista um stofnun sérstakrar nefndar um gerð jafnréttisáætlanar, ýmis fundarboð og efni til kynningar. Hægt er að sjá fundarboð og dagskrá í heild sinni hér á hægri væng síðunnar.   Fundurinn er öllum opinn.   Bæjarstjóri

Fyrsta plata stálþilsins í nýja litlu-bryggju var rekin niður í gær, fimmtudaginn 12. október. Um framkvæmd verksins sér Berglín ehf. í Stykkishólmi en Hagtak hf. sér um að koma þilinu niður. Áætlað er að stálþilið allt verði komið niður í um mánaðamótin október – nóvember.   Starfsmenn Hagtaks hf. koma plötunni fyrir.   Verklok á fyrsta verkhluta við byggingu nýrrar litlu-bryggju er áætlaður 1 .desember nk. Að því loknu verður boðinn út annar verkhluti sem er þekja og lagnir. Ný litla-bryggja verður 20 m á breidd og 100 m á lengd. Sjá fleiri myndir hér.  

Sunna Njálsdóttir, Guðlaug Guðmundsdóttir, Jóna Ragnarsdóttir, Friðbjörg Matthíasdóttir og Dóra Aðalsteinsdóttir ásamt nemendum.   Í síðustu viku heimsótti fríður hópur kvenna í íslenskum þjóðbúningum Grunnskóla Grundarfjarðar. Konurnar heimsóttu nemendur í yngstu bekkjum skólans og sýndu þeim bæði upphlut og peysuföt. Af þessari heimsókn lærðu nemendur m.a. að í gamla daga voru peysufötin spariföt en konur voru í upphlut þegar þær voru við vinnu. Einnig sáu krakkarnir að enginn er eins, hver og einn búningur er sérstakur. Tilefni þessarar heimsóknar var að nemendur í 3. bekk eru að læra um helstu einkenni lands og þjóðar. Konurnar vöktu að vonum mikla athygli og aðdáun nemenda og starfsfólks skólans.

Mánudaginn 16. október n.k. tekur Hjörtur Hans Kolsöe við starfi skipulags- og byggingafulltrúa í Grundarfirði. Hjörtur, sem er byggingafræðingur, hefur starfað undanfarna mánuði sem aðstoðarmaður á tæknisviði bæjarins. Jafnframt því að gegna starfi skipulags- og byggingafulltrúa, mun Hjörtur veita forstöðu öllum verkefnum á tæknisviðinu.