Fréttir & tilkynningar

Þeir sem fengu nýjar bækur fyrir 4. jan. mega drífa sig að lesa og skila þeim. Þær hafa flestar 14 daga skilafrest og aðrir lesendur bíða spenntir eftir þeim. Þetta á við um barnabækur líka þó að þær hafi allar 30 daga skilafrest. Látum nýju bækurnar ganga svo að sem flestir komist til að lesa þær næstu mánuðina.

Framkvæmdir við Ölkelduveg   Í dag þann 11. janúar 2006, var verið að grafa fyrir fimm íbúðum í bænum. Við Ölkelduveg var verið að taka grunn fyrir 4 íbúða raðhús sem Stafna á milli ehf. á Akranesi byggir. Í Fellasneið var einnig verið að grafa grunn í dag fyrir einbýlishúsi.   Framkvæmdir í Fellasneið

Í gær var loksins kveikt í þrettándabrennunni en veður hefur verið óhagstætt undanfarna daga.   Nokkrir tugir manna fylgdust með brennunni en engum sögum fer hins vegar af álfum. Sennilegt þykir að margir þeirra séu uppteknir við að koma sér fyrir í nýjum heimkynnum eftir flutninga um áramótin.

Eigið þið barn með vandamál í skóla t.d. athyglisbrest, ofvirkni, þunglyndi, einelti eða annað sem íþyngir fjölskyldunni?   Miðvikudaginn 11. janúar 2006, kl. 20, munu koma talsmenn frá Sjónarhóli og ADHD samtökunum og halda fund í samkomuhúsinu með kennurum og foreldrum og að lokum er ráðgert að stofna stuðningshópa aðstandenda.   Félags- og skólaþjónustan, heilsugæslan og grunnskólarnir á Snæfellsnesi.

Í desember var gerð tilraun til að halda úti kafla um stofnun desembermánaðar. Það reyndist ekki skynsamlegt í auglýsingaflóði og önnum jólamánaðarins.   Tökum þá upp þráðinn þar sem frá var horfið og áhaldahús Grundarfjarðar verður stofnun janúarmánaðar.   

Eins og kunnugt er þurfti að fresta þrettándabrennunni sökum veðurs á þrettándanum 6. janúar. Í gærkvöldi var stefnt að því að kveikja í brennunni, en veðurguðirnir voru ekki hliðhollir og margt fór öðruvísi en að var stefnt.  Skrúðganga með álfakóng og álfadrottningu í broddi fylkingar lagði af stað frá Fellaskjóli kl. 20.00 og gekk að brennustað í námunni við iðnaðarsvæðið.    

Íþróttaárið í Grundarfirði byrjar vel. 3.fl karla er kominn í úrslit íslandsmótsins í knattspyrnu innanhúss. Strákarnir unnu þrjá leiki og gerðu eitt jafntefli. Þeir unnu lið Fjölnis, Grindavíkur og BÍ/Bolungavíkur en gerðu jafntefli við ÍR. Strákarnir spiluðu vel og sýndu mikinn baráttuhug í síðasta leiknum en hann urðu þeir að vinna til þess að vera öruggir áfram. Riðlakeppnin fór fram í Íþróttamiðstöðinni í Grafarvogi. Við óskum þeim til hamingju með árangurinn.

Bækur í bústaðinn og fríið. Aukabækur kosta 50-100 kr. Skiptibókamarkaður. Fullt af góðum bókum; ævisögur, skáldsögur úr sögusafni heimilanna, spennusögur og kiljur; Ævintýrabækurnar og Fimm bækurnar eftir Enid Blyton og fleiri og fleiri. Magnafsláttur.     Tilvalið í ódýran afmælispakka til afa og ömmu eða pabba og mömmu. Nú eða systur, bróður, vinar eða vinkonu. Alltaf opið frá kl. 15:00 virka daga.    

68. Stjórnarfundur Eyrbyggja 3. janúar 2006 kl. 20:00 að Dalvegi 2 í Kópavogi.   Viðstaddir: Hermann Jóhannesson, Ásthildur Kristjánsdóttir, Benedikt Gunnar Ívarsson, Guðlaugur Pálsson, Orri Árnason.   Dagskrá: 1. Hver er staðan á efnisöflun ? 2. Hver er staðan í fjármálum ? 3. Undirbúningur næsta aðalfundar. 4. Önnur mál.  

Gleðilegt ár og takk fyrir frábært íþróttaár. Af starfi félagsins er það helst að frétta að æfingar hefjast aftur 3. janúar. Íslandsmótin í fótbolta innanhúss fara fram nú í janúar og er einhver að frá okkur að spila nánast hverja helgi í janúar. Við höfum ekki fengið dagsetningu á héraðsmót HSH í fótbolta og frjálsum en vaninn er það sé fótboltamót í janúar og frjálsíþróttamót í febrúar.   Getraunastarfið er enn á fullu og verður Sögumiðstöðin áfram opin á laugardagsmorgnum. Hópleikurinn hefur tekist vel og eiga skipuleggjendur hans hrós skilið.   Stöðuna í leiknum getið þið séð hér fyrir neðan.