Fréttir & tilkynningar

Fjallað verður um eiginleika og áhrif ilmkjarnaolía á líkama og huga og kynntar ýmsar notkunarleiðir. Farið verður í blöndun á olíunum  og munu þátttakendur útbúa sínar eigin blöndur til að fara með heim.   Innifalið í verði er námskeiðsmappa með uppskriftum og lýsingum á ilmkjarnaolíum og áhrifum þeirra.   Hefst 31. okt. kl. 18:00 til 22:00 í Grunnskólanum í Grundarfirði. Kennari: Friðgerður Jóhannsdóttir hjúkrunarfræðinugur   Upplýsingar  og skráning: Í síma 4372390 tölvupóstur  svava@simenntun.is www.simenntun.is  

Enn er laust á Tréskurðarnámskeið sem Símenntun Vesturlands stendur fyrir. Námskeiðið verður haldið dagana 21. og 22. október Í grunnskólanum í Grundarfirði. Námskeiðið er 2 skipti, alls 16 kennslustundir. Verð kr. 14.900. Kennari: Jón Adólf Steinólfsson listamaður. Þátttakendur muna læra grunnhandtök í tréútskurði og hanna eitt til tvö verk á námskeiðinu.   Upplýsingar og skráning í síma 4372390 og á www.simenntun.is.   Hægt er að skoða verk eftir listamanninn á heimasíðu hans www.jonadolf.com.

Við í Unglingadeildinni Pjakk viljum þakka fyrir góðar móttökur Þriðjudaginn 11. okt er við gengum í hús og seldum klósettpappír. Einnig viljum við benda á það að við eigum nóg eftir og ef einstaklingar eða fyrirtæki hafa áhuga á að kaupa góðan klósettpappír á góðu verði þá er hægt að ná í okkur í síma: 847-2969   Kærar kveðjur, Gísli Valur, umsjónarmaður Unglingadeildarinnar Pjakks

Innlit á vefsíðu Grundarfjarðarbæjar náðu nýjum hæðum í síðasta mánuði. Alls voru innlitin 10.828 en voru liðlega 6.000 í sama mánuði 2004. Nú þegar eru innlit á vefsíðuna fleiri en allt árið í fyrra.   Það er mikilvægt að notendur vefsíðunnar geti treyst þeim upplýsingum sem þar birtast og því er síðan uppfærð daglega.  

Nú er farið að færast fjör í Hópleikinn, því margir hópar eru farnir að banka á efsta sætið. Eins og stöðutaflan hér fyrir neðan sýnir, þá er EÝ 1825 sem hafa forystu eins og er, en aðeins með tveggja stiga mun á S.G.Hópinn. En Sætir sem, eru í þriðja sæti eru í mikilli sókn.    

44 einstaklingar komu og gáfu blóð eða gerðust blóðgjafar þegar blóðbankabílinn kom til Grundarfjarðar 5. október sl. Voru forstöðumenn blóðsöfnunarferða mjög ánægðir með ferðina og vildu koma á framfæri þakklæti til Grundfirðinga. Jafnframt hlakka þau til að heimsækja Grundarfjörð aftur í vor til að sjá hvort metið verði slegið. 

Vinnuhópur/tillöguhópur, sem skipaður var af umhverfisnefnd, hefur gert tillögu að mótun Hönnugils, en það er gilið þar sem “Merkjalækur” rennur fram um, en þessi lækur er sagður vera á merkjum Hellnafells og Grafar.   Forsaga málsins er sú að umhverfisnefnd gerði á sínum tíma tillögu að því að móta þetta svæði sem útivistarsvæði og skildi ”tippa” þangað efni sem til félli í tengslum við ýmsar framkvæmdir í bænum.  Bæjarráð Grundarfjarðar samþykkti þessa tillögu umhverfisnefndar á fundi sínum í maí sl., en óskaði að fá heildstæðar tillögur um skipulag þessa svæðis. 

Erla Bryndís Kristjánsdóttir landslagsarkitekt hjá Teiknistofunni Eik er nú að leggja lokahönd á  tillögur sínar um aðalskipulag dreifbýlis. Á fundi bæjarstjórnar þann 15. september sl. kynnti hún bæjarstjórn og umhverfisnefnd drög að tillögunum. Farið var yfir áherslur og meginmarkmið með gerð skipulagsins, m.a. um sjálfbæra þróun.

Nú hefur það fengist staðfest, eftir áreiðanlegum heimildum, að 007 – James Bond – er Snæfellingur – að sjálfsögðu – og gott ef hann er ekki Grundfirðingur. Hann mun heiðra okkur með nærveru sinni á menningarhátíðinni Rökkurdögum, en sérlegur leiðsögumaður hans þar verður Ingi Hans. Undirbúningi Rökkurdaganna er nú að ljúka. Hátíðin hefst fimmtudaginn 20. október n.k. og stendur í um þrjár vikur, en þetta er í annað sinn sem hún er haldin. 

61. fundur bæjarstjórnar Grundarfjarðar verður haldinn á morgun, fimmtudaginn 13. október kl. 17.00 í samkomuhúsinu. Á dagskrá eru m.a. fundargerðir nefnda og ráða, niðurstöður sameiningarkosninganna, endurskoðuð fjárhagsáætlun 2005, umferðarskipulag við grunnskóla, reglur um byggðakvóta og ýmis gögn til kynningar. Fundurinn er öllum opinn.   Bæjarstjóri