Fólkið, fjöllin, fjörðurinn

Sjötta bindi bókarinnar Fólkið, fjöllin, fjörðurinn er komin út. Eyrbyggjar, Hollvinasamtök Grundarfjarðar, sáu um útgáfuna. Meðal efnis er:   Fuglalíf í Melrakkaey Hestamannafélagið í 30 ár Manntalið 1950 Annáll 2004 Upphaf hestamannskunnar í Eyrarsveit Holdsveikraspítalinn á Hallbjarnareyri Munnmælasögur úr Eyrarsveit Öndverðareyri Ball í þinghúsinu Grund Myndir úr safni Bærings Cecilssonar   Bókin kostar 2.500 kr. og munu nemendur 9. bekkjar Grunnskóla Grundarfjarðar ganga í hús og selja bókina í vikunni. Bókina er einnig hægt að nálgast hjá Önnu Maríu í s: 869-6076. Einnig er hægt að panta bókina á heimasíðu Eyrbyggja með því að senda póst á eyrbyggjar@grundarfjordur.is.   Sjá kápu bókarinnar hér.

60% fleiri innlit á vefsíðuna

60% fleiri innlit hafa verið á vefsíðu Grundarfjarðar það sem af er árinu 2005 en voru allt árið 2004. Alls hafa innlitin verið liðlega 108 þúsund eða tæp 10 þúsund á mánuði að jafnaði.   Mánaðarleg innlit 2004-2005

Fundur um mótun fjölskyldustefnu

Miðvikudagskvöldið 30. nóvember sl. var haldinn í samkomuhúsinu opinn fundur um mótun fjölskyldustefnu. Fundurinn var liður í vinnu sem fram fer á vegum Grundarfjarðarbæjar og stefnt er að því að ljúki um miðjan mars n.k. með samþykkt fjölskyldustefnu Grundfirðinga.  

Einkunnir úr samræmdu prófunum í 4. og 7. bekk 2005

Samræmdu prófin í íslensku og stærðfræði í 4. og 7. bekk voru lögð fyrir í október. Nú hafa einkunnir borist nemendum og skólum landsins.   Meðaleinkunnir að þessu sinni líta svona út:

Örnefnaskilti Eyrbyggja

Eyrbyggjar, hollvinasamtök Grundarfjarðar, hafa afhent Grundarfjarðarbæ örnefnaskilti. Skiltið var sett upp á nýja áningarstaðnum við Kolgrafafjörð á vígsludegi nýju brúarinnar og vegarins þann 21. október sl. Eyrbyggjarnir, með Hermann Jóhannesson í fararbroddi, létu útbúa skiltið skv. hönnun Hermanns, en skiltið er að formi til eins og opin bók. Í bókinni má lesa um Eyrbyggja hina fornu, örnefni í firðinum og gönguleiðir á svæðinu.   Hermann Jóhannesson Eyrbyggi og Björg Ágústsdóttir bæjarstjóri við skiltið  

Aðventutónleikar kórs Fjölbrautaskóla Snæfellinga

Kór Fjölbrautaskóla Snæfellinga mun halda aðventutónleika sunnudaginn 4. desember kl. 20:00 í  Grundarfjarðarkirkju.   Efnisskráin verður mjög  fjölbreytt, bæði jólalög og þekkt íslensk sönglög.  Einnig mun Mattías Arnar Þorgrímsson syngja einsöng.  Undirleikari á tónleikunum er Valentina Kay.  Stjórnandi Hólmfríður Friðjónsdóttir.  

Fullveldisdagurinn

Í dag er fáni dreginn að hún á fánastöngum við bæjarskrifstofuna og heilsugæslustöðina. Tilefni þessa fánadags er að fyrir 87 árum, 1. desember 1918, tóku sambandslög Íslands og Danmerkur gildi. Lögin mörkuðu þáttaskil í sjálfstæðisbaráttunni, Ísland varð fullvalda ríki í konungssambandi við Danmörku.  

Aðventutónleikar í Stykkishólmskirkju

Tónleikarnir verða haldnir sunnudaginn 4. desember 2005 kl. 17.00   Flytjendur eru: Sigrún Hjálmtýsdóttir, sópran Sigurður I. Snorrason og Kjartan Óskarsson, klarínettur Emil Friðfinnsson og Þorkell Jóelsson, horn Brjánn Ingason og Björn Árnason, fagott  

Fundur um mótun fjölskyldustefnu

Nefnd um mótun fjölskyldustefnu boðar til opins fundar í samkomuhúsinu miðvikudaginn 30. nóvember n.k. kl. 20.00   Í gangi er vinna við mótun fjölskyldustefnu Grundfirðinga. Ætlunin er að fá að þeirri vinnu stofnanir í bænum, hagsmunaaðila og sem flesta íbúa. Fyrsta skrefið í vinnu með íbúum og hagsmunaaðilum er þessi fundur, þar sem leitað verður eftir því sem helst brennur á íbúum varðandi málefni fjölskyldunnar. Reynt verður að draga fram áherslur og forgangsraða.   Fundinum stýrir Sigurborg Kr. Hannesdóttir frá Alta, sem jafnframt er starfsmaður nefndar um mótun fjölskyldustefnu. Fundurinn verður með því sniði að þátttakendur þurfa ekki að taka til máls til að segja skoðun sína, heldur verður hægt að skrifa skilaboð á gula miða sem unnið verður með.   DAGSKRÁ -          Hvað er það sem helst brennur á íbúum varðandi málefni fjölskyldunnar? -          Hverjar eiga að vera megináherslur í fjölskyldustefnu? -          Hvernig á að forgangsraða verkefnum?   Nefndin mun svo vinna úr niðurstöðum fundarins, ásamt fleiri gögnum, og skipa vinnuhópa til áframhaldandi starfs um einstök atriði.   Fundurinn er öllum opinn – fjölmennum!   Nefnd um mótun fjölskyldustefnu

Umsóknir um byggðakvóta

Minnt er á að umsóknir um byggðakvóta fyrir fiskveiðiárið 2005-2006 þurfa að berast skriflega til bæjarskriftofu Grundarfjarðar fyrir kl.15:30 föstudaginn 2. desember. Nánar hér.   Bæjarstjóri