Fréttir & tilkynningar

Bæjarráð Grundarfjarðar hefur gert tillögu til Sjávarútvegsráðuneytisins að úthlutunarreglum vegna úthlutunar 18 þorskígildistonna er úthlutað hefur verið til Grundarfjarðar.  

Í Grundarfjarðarhöfn var landaður afli í október 1.327.739 kg en í október 2002 1.229.798 kg.   Hér fyrir neðan er aflinn sundurskiftur eftir tegundum bæði árin.   Skipakomur í Grundarfjarðarhöfn þ.e. landanir á fiski á síðasta fiskveiðiári voru 2.693.  

Á bæjarstjórnarfundi 16. október sl. samþykkti bæjarstjórn ályktun um verndarsvæði Breiðarfjarðar.   Bæjarstjórn Grundarfjarðar samþykkir að kannað verði hvort hægt sé að breyta mörkum verndarsvæðis Breiðafjarðar, þannig að Grundarfjarðarbær standi utan þess og/eða aðrir möguleikar kannaðir er myndu einfalda stjórnsýslu vegna verndunar Breiðafjarðar.  

48. stjórnarfundur Eyrbyggja 4. nov. 2003  kl 20:00 í Lágmúla í Reykjavík.   Viðstaddir: Ásthildur Elva Kristjánsdóttir, Orri Árnason, Guðlaugur Þór Pálsson, Bjarni Júlíusson, Hafdís Gísladóttir, Hermann Jóhannesson.  

Þriðjudagskvöldið 28. október s.l. stóð íþrótta- og tómstundanefnd fyrir fundi undir yfirskriftinni ,,Vitið þið hvað unglingarnir gera eftir skóla?” Tilgangur fundarins var að kynna fyrir foreldrum þá félagsstarfsemi sem unglingum í Grundarfirði stendur til boða. Erindi voru flutt frá UMFG; Pjakki, unglingadeild björgunarsveitarinnar, Tilveru, Félagsmiðstöðinni Eden, KFUM & K og kynntur var nýstofnaður skátahópur. Á fundinum kom fram að unglingar á grunnskólaldri geta haft nóg fyrir stafni en í vetur geta þau sótt félagsstarfsemi af einhverju tagi 6 kvöld vikunnar og er þá ótalið allt íþróttastarf UMFG. Fundurinn var vel sóttur bæði af foreldrum og unglingunum sjálfum. Almennar umræður sköpuðust að erindaflutningi loknum.  

Undirbúningur fjárhagsáætlunar Grundarfjarðarbæjar og stofnana 2004 stendur nú yfir.   Í auglýsingu í Vikublaðinu Þey var auglýstur frestur fyrir félagasamtök til að leggja fram styrkbeiðnir. Frestur hefur verið framlengdur og skal beiðni vera lögð fram á bæjarskrifstofu Grundarfjarðar í síðasta lagi föstudaginn 7. nóvember n.k.  

Grundarfjarðarbær hefur kært framkvæmd samkeppninnar um rafrænt samfélag til kærunefndar útboðsmála.     Eru m.a. gerðar athugasemdir við breytingar á valmælikvörðum samkeppninnar, sem bitnuðu sérstaklega illa á umsókn og hugmyndum Grundfirðinga um rafrænt samfélag.  Eftir forval sl. vor var umsókn Grundarfjarðarbæjar valin til áframhaldandi þátttöku í samkeppninni.  Umsókn Grundarfjarðarbæjar var byggð á hugmyndavinnu undirbúningshópa sem tryggðu víðtækt samráð við íbúana.     Búst er við að kærunefndin taki málið fyrir innan tíðar.  

Vegagerðin hefur í samvinnu við Verkfræðistofuna VST undanfarin misseri verið að hanna svokallaða hverfisvæna leið í gegnum Grundarfjörð. Tillaga að breyttum umferðamannvirkjum á Grundargötu liggur nú fyrir. Af því tilefni boðar Grundarfjarðarbær til kynningarfundar um ,,hverfisvæna leið í gegnum Grundarfjörð”, mánudaginn 27. október næstkomandi Um er að ræða kynningu á umferðarmannvirkum á Grundargötu s.s. hraðahindrunum, gangbrautum, skiltum o.fl., sem Vegagerðin hyggst bjóða út á næstunni.   Fundurinn er öllum opinn og verður haldinn í samkomuhúsi Grundarfjarðar frá kl. 17:00 – 19:00.  

Auglýsing um tillögu að deiliskipulagi framhaldsskólalóðar við Grundargötu var birt í Lögbirtingablaðinu 3. október sl.   Tillagan tekur til svæðis sem liggur milli Grundargötu 42 og 50. Auglýsingin er í samræmi við áður auglýsta tillögu að aðalskipulagi Grundarfjarðar 2003-2015, sem nú er í staðfestingarferli.  Svæðið er skilgreint sem miðsvæði í aðalskipulagstillögunni og afmarkast af af íbúðarsvæði við Sæból í norðri og vestri, Grundargötu í suðri og miðsvæði í austri.  

Á næsta fundi bæjarstjórnar Grundarfjarðar verður tekin til síðari umræðu samþykkt um kattahald í Grundarfirði.  Í drögum er gert ráð fyrir að kattahald  muni sæta takmörkunum þannig að skrá eigi alla heimilisketti hjá Grundarfjarðarbæ.  Þar munu eigendur fá afhenta plötu með skráningarnúmeri, heimilisfangi og símanúmeri eiganda kattarins.  Kattareigandinn þarf árlega að láta hreinsa köttinn af spóluormum.  Kattahald í dreifbýli mun að öllu jöfnu ekki sæta takmörkunum.    Eigendum verður gert að gæta þess að kettir þeirra valdi ekki tjóni, hættu, óþrifnaði eða raski ró manna.  Á varptíma ber forráðamönnum katta að taka tillit til fuglalífs á varptíma, t.d. með því að hengja bjöllu á ketti og eftir atvikum að takmarka útiveru katta.    Jafnframt er bæjarstjórn Grundarfjarðar veitt heimild til að gera ráðstafanir til útrýmingar á villiköttum.