Fréttir & tilkynningar

Byggðastofnun hefur sent út til allra sveitarfélaga á landsbyggðinni verkefnislýsingu um framkvæmd og skipulag á samkeppni undir yfirskriftinni ,,Rafrænt samfélag”. Í inngangi lýsingarinnar segir m.a.;   ,,Á komandi árum mun þróun búsetu og atvinnulífs á landsbyggðinni að hluta byggjast á því hvernig einstaklingum og fyrirtækjum tekst að hagnýta sér þá möguleika sem felast í upplýsinga- og fjarskiptatækni. .... Meginhugmynd verkefnisins er að hrinda í framkvæmd metnaðarfullum aðgerðum sem hafa það að markmiði að auka nýsköpun í atvinnulífi og bæta afkomu íbúanna, auka menntun og menningarstarfsemi, bæta heilsugæslu og félagslegar aðstæður og efla lýðræðið...”  

Það er þorrablót í leikskólanum í dag. Fyrst verður skemmtun þar sem börnin sýna leikrit og syngja og síðan verður boðið upp á þorramat. Auk foreldra leikskólabarna, er fyrsta bekk úr Grunnskólanum boðið á þorrablót leikskólans.  

Atvinnuráðgjöf Vesturlands er með kynningu í Grundarfirði í dag. Allir fjórir atvinnuráðgjafarnir verða á ferðinni og heimsækja fyrirtæki á staðnum og í kvöld verður opinn fundur á Hótel Framnesi um atvinnu- og byggðamál. Fundurinn hefst kl. 20.30 og mun Atvinnuráðgjöfin kynna starfsemi sína. 

Í morgun kl. 8.15 hélt sjávarútvegsnefnd Alþingis fund í Reykjavík um stöðu skelfiskveiða í Breiðafirði og rannsóknir á skelfiski.   Til upprifjunar má nefna eftirfarandi. Á fiskveiðiárinu 2000-2001 var úthlutað tæplega 1715 tonnum af hörpuskel til fyrirtækja/útgerða í Grundarfirði. Árið 2001-2002 var úthlutunin rúm 1393 tonn og árið 2002-2003 var úthlutunin komin niður í 857,4 tonn. Skerðingin á tveimur árum er skv. þessu 50%.  

Þessa dagana er fundað nokkuð stíft í sorpnefnd Grundarfjarðarbæjar, en það er sérstök starfsnefnd sem bæjarstjórn skipaði til að fjalla um breytingar í sorpmálum og rekstur málaflokksins.   Nefndin hefur verið að vinna að hönnun og fyrirkomulagi á sorpmóttökustöð en Erla Bryndís landslagsarkitekt hafði hannað stöðina og umhverfi hennar. Einnig hefur nefndin verið að leggja mikla vinnu í að undirbúa útboðsgögn og ræða tilhögun sorpútboðs sem ætlunin er að fram fari með vorinu. Sú vinna verður lögð fyrir bæjarstjórn til endanlegrar afgreiðslu þegar þar að kemur.  

Það er margt fróðlegt að finna á Internetinu, m.a. heimasíður sem Grundfirðingar hafa búið til og halda úti.   Á heimasíðu Guðjóns Elissonar, www.gauiella.is, er kominn inn tengill þar sem er að finna loftmynd af þéttbýli Grundarfjarðar.   Á síðunni segir: ,,Sum heimilanna og fyrirtækjanna sem sjást á þessari mynd eru með heimasíður og eru þá viðkomandi hús á loftmyndinni einnig tenglar inn á þær heimasíður sem við á. Endilega sendið tölvupóst til Gaua ef þið Grundfirðingar eruð með heimasíðu sem ekki er með tengil á húsið ykkar og mun því kippt í lag. Vonandi fæst bráðlega nýrri loftmynd líka.”  

Bæjarstjóri fékk í síðustu viku beiðni um að fletta upp á tilteknu atriði í gamalli fundargerðarbók hreppsnefndar Eyrarsveitar frá 1947. Var það gert og umbeðnar heimildir fundnar. Í leiðinni datt bæjarstjóri ofan í nokkrar fundargerðir í sömu bók, og eins og svo oft áður, er ekki hægt að hætta að lesa þennan fróðleik – og reyndar skemmtiefni – þegar byrjað er.  

Þann 14. janúar sl. kom verkefnisstjórn og starfsmaður þróunarverkefnis um Eyrbyggju – sögumiðstöð og sögugarð saman til fundar á bæjarskrifstofu, ásamt fulltrúa Atvinnuráðgjafar Vesturlands (ATSSV). Tilefnið var að nú er lokið tilteknum áfanga í vinnu við verkefnið og var lögð fram skýrsla sem Ingi Hans Jónsson starfsmaður verkefnisins hefur unnið um möguleika á stofnsetningu sögumiðstöðvar í Grundarfirði og sögugarðs á Grundarkampi, sjá nánar í bæjardagbók þann 22. október 2002. Verkefnið var styrkt af ATSSV og var Ólafur Sveinsson forstöðumaður ATSSV fulltrúi í verkefnisstjórninni, auk þess sem starfsmaður og verkefnisstjórn nutu dyggilegs stuðnings Ásthildar Sturludóttur ferðamálafulltrúa ATSSV. 

 Á janúarfundi bæjarstjórnar var í kvöld samþykkt fjárhagsáætlun ársins 2003 fyrir bæjarsjóð og fyrirtæki hans. Á næstunni verður sagt frá því hér í bæjardagbók hvað í áætluninni felst, í hvaða framkvæmdir eða fjárfestingar á að ráðast á árinu, o.s.frv.

Mjög mikið er spurt um það hér í Grundarfirði hvað líði áformum um þverun Kolgrafarfjarðar.  Samkvæmt upplýsingum Vegagerðarinnar í síðustu viku er vinna við að útbúa útboðsgögn vegna framkvæmdarinnar nú á lokastigi.   Búið er að auglýsa verkið á EES-svæðinu, en það þarf að gerast með góðum fyrirvara.   Áform eru uppi um að tilboð verði opnuð í byrjun mars n.k., að verkið geti hafist í byrjun apríl en að verklok verði haustið 2005. Er það frávik frá fyrri áætlunum sem gerðu ráð fyrir verklokum 2004, en helgast af nauðsynlegum verktíma fyrir framkvæmdina.