Fréttir & tilkynningar

Eru B.P. komnir á skrið?   Það er langt síðan hópur hefur hækkað sig á milli helga um 14 sæti eins og B.P. gerði s.l. helgi, fór úr 16. sæti í annað sætið (Pálmi sennilega sett meiri kraft í olíuna).

  2. nóvember 2007 - frétt á vef Skessuhorns Rökkurdagar  í Grundarfirði voru formlega settir á Hótel Framnesi í gærkvöldi með sýningu áhugaljósmyndarans Sverris Karlssonar. Guðmundur Ingi Gunnlaugsson bæjarstjóri setti sýninguna og bauð gesti velkomna. Einnig rakti hann dagskrá Rökkurdaga sem verður mjög fjölbreytt. Myndir Sverris á sýningunni eru 15 talsins og eru teknar víða um Snæfellsnes. Sverrir hefur tekið myndir í mörg ár og hefur meðal annars myndað fyrir Skessuhorn.     Á myndinni er Sverrir ásamt Guðmundi Inga bæjarstjóra og Shelagh Smith hótelstjóra, en hún átti afmæli þennan sama dag. Í afmælisgjöf gaf Sverrir henni ljósmynd að eigin vali.

85. fundur bæjarstjórnar Grundarfjarðarbæjar verður haldinn í samkomuhúsinu fimmtudaginn 8. nóvember 2007, kl. 16.15 og er öllum opinn.  Sjá dagskrá og fundarboð með því að smella hér. 

Almennt hefur tekist vel til í starfsemi Fjölbrautaskóla Snæfellinga (FSN) og að fjöldi nemenda hafi orðið nokkru meiri en áætlanir gerðu ráð fyrir sem bendi til þess að skólinn hafi skapað sér tiltrú og uppfyllt þær væntingar sem til hans voru gerðar. Þetta kemur fram í úttekt sem gerð hefur verið á starfsemi skólans. Nýlega er lokið úttekt sem menntamálaráðuneyti lét gera á Fjölbrautaskóla Snæfellinga (FSN). Úttektin var unnin af Trausta Þorsteinssyni frá skólaþróunar-sviði Háskólans á Akureyri og Ásrúnu Matthíasdóttur frá kennslufræði- og lýðheilsudeild Háskólans í Reykjavík. Miðaðist úttektin við fyrstu þrjú árin í starfsemi skólans en hann tók tók til starfa haustið 2004. Frétt á vef Mbl.is

Rökkurdagar verða settir í kvöld, 1. nóvember kl 20:00, á Hótel Framnesi. Þar verður opnuð ljósmyndasýning Sverris Karlssonar. Sverrir er áhugaljósmyndari hér í Grundarfirði og til gamans má geta þess að hann er með heimasíðu sem er áhugavert að skoða.  http://www.123.is/sverrirk/default.aspx?page

Nemendur grunnskólans verða með dagskrá í íþróttahúsinu, föstudaginn 16. nóvember, kl. 11.00 - 12.30. Dagskráin verður helguð minningu Jónasar Hallgrímssonar í tilefni af tveggja alda fæðingarafmæli skáldsins. Allir hjartanlega velkomnir.

 Ekkert lát er á síldveiðinni í Grundarfirði og verður sára lítillar síldar vart á hefðbundinni veiðislóð út af Suðurströndinni. Nú eru um þrjár vikur síðan síldin fannst í Grundarfirði, og hafa síldarskipin hvað eftir annað fyllt sig og sigla svo með aflann til Austfjarðahafna og Vestmannaeyja. Þegar síldin er næst landi, eru skipin að veiðum rétt utan við hafnarminnið í Grundarfirði og þar fékk eitt skipið ljósastaur í veiðarfærin, sem sennilega hefur brotnað af bryggju í óveðri.-   Frétt á Vísir

  29. október 2007 Í tilefni þess að héraðsfréttablaðið Skessuhorn á Vesturlandi verður brátt 10 ára gamalt var ákveðið að minnast tímamótanna með útgáfu viðtalsbókar. Bókin Fólkið í Skessuhorni kom úr prentun fyrir helgi og verður dreift í verslanir í þessari viku. Hún hefur að geyma 62 viðtöl við áhugaverða Vestlendinga. Blaðamennirnir Fríða Björnsdóttir og Jóhanna G Harðardóttir völdu efnið og bjuggu til prentunar en höfundar efnis eru 18 blaðamenn og fréttaritarar sem haft hafa viðdvöl á Skessuhorni á liðnum árum. Bókin er 160 síður í stóru broti og ríkulega myndskreytt. Fyrsta eintak bókarinnar var afhent Einari Gíslasyni frá Lundi við stutta athöfn fyrir skömmu. Einar átti hugmyndina að nafngift blaðsins fyrir rúmum áratug síðan, en æ síðan hefur hið eftirminnilega nafn Skessuhorns stutt við útgáfuna á ýmsan hátt.   Frétt á vef Skessuhorns

 Rökkurdagar hefjast í Grundarfirði nk. fimmtudag kl. 17 í Sögumiðstöðinni. Þá verður undirritaður samningur milli Grundarfjarðarbæjar og Eyrbyggju- sögumiðstöðvar og samstarfið sem og dagskrá Rökkurdaga kynnt. Áhersla verður lögð á íslenskar bíómyndir að þessu sinni, nýjar sem og nokkrar eldri.

Undanfarna daga hefur síldveiði glæðst á ný í Grundarfirði.  Veðrið hefur verið hagstætt til veiða og sjórinn lygn.  Flesta daga hafa verið fjögur til fimm síldveiðiskip að veiðum í einu.  Vandasamt er að kasta nótinni inni á firðinum því dýpi er afar misjafnt.  Þetta fengu skipverjar á Berki NK að reyna síðastliðinn föstudag þegar nótin flæktist í skrúfu og skrúfuöxli skipsins.  Það tók kafara 38 klukkustundir að losa nótina.  Börkur fékk svo hluta af stóru kasti hjá Kap VE og sigldi til heimahafnar til löndunar í gærkvöldi.